प्रेमपत्र पठाएको भन्दै युवकमाथि निर्घात कुटपिट

प्रमपत्र पठाएको भन्दै रौतहटको दुर्गा भगवती गाउँपालिका–५ का विकास पासवानमाथि निर्घात कुटपिट गरिएको छ । स्थानीय युवतीलाई प्रेमपत्र लेखेको भन्दै डोरीले बाँधेर पासवानलाई कुटपिट गरिरहेको भिडियो समेत सामाजिक सञ्जारमा भाईरल भएको छ ।

कक्षा ११ मा पढ्ने पासवानलाई बाँधेर कुटपिट गर्ने वडा नम्बर ४ बस्ने किन्सीदेव गिरी र उनका छोराहरु सन्तोष गिरी, छोटु गिरीलगायतको समूहले बाँधेर पिटेको प्रत्यक्षदर्शीले बताएका छन् ।

कुटपिटको भिडियो सामाजिक सञ्जालमा भाइरल भएपछि प्रहरीले पनि घटनाबारे जानकारी पाएको छ । जिल्ला प्रहरी कार्यालय रौतहटका प्रहरी उपरीक्षक (एसपी) शिद्धिविक्रम शाहले कुटपिटबारे उजुरी परेको बताए । पीडित युवकको स्वास्थ्य जाँच गरिएको र घटनामा संलग्नहरु फरार रहेको एसपी शाहले बताए । घटनामा संलग्नको खोजी भइरहेको छ, अहिले अनुसन्धानकै क्रममा छौँ, साझसम्म केही आउँला’ एसपी शाहले भने । युवक दलित समुदायको भएकाले गाउँका गैरदलितहरुले कुटपिट गरेको स्थानीयको दावी छ ।