बलात्कार गर्न नदिँदा घाँटी रेटेर ९ वर्षीया शिवानीको हत्या

सप्तरीमा ९ वर्षीया एक बालिकाको घाँटी रेटेर भएको हत्या घटनाका सलग्न एक जना आरोपी युवक पक्राउ परेका छन् ।

पक्राउ पर्नेमा सप्तरीको डाक्नेश्वरी नगरपालिका वडा न।–३ तरहि हटैल टोलका १९ वर्षीय रोहितकुमार यादव रहेका छन् । गत शुक्रबार घाँस काट्न घरबाट निस्केकी सोही वडाका रामउद्गार यादवकी छोरी शिवानीकुमारी यादवको हत्या भएको थियो । घटनाको अनुसन्धान गर्ने क्रममा रोहितलाई पक्राउ गरिएको सप्तरीका प्रहरी उपरीक्षक राजेन्द्र प्रसाद धमलाले बताएका छन् । यसैबिच आरोपीको प्रारम्भिक वयान अनुसार करणी गर्न खोज्दा नमाने घाँटी रेटी हत्या गरिएको खुलेको छ । आरोपीलाई ईलाका प्रहरी कार्यालय कल्याणपुरमा राखेर आवश्यक थप अनुसन्धान कार्य भइरहेको जिल्ला प्रहरी कार्यालय सप्तरीले जनाएको छ ।

यता घटना भएसँगै प्रदेश प्रहरी कार्यालयका प्रहरी नायब उपरीक्षक ज्ञानकुमार महतो नेतृत्वमा विशेष टोली खटाइएको थियो । पछिल्लोपटक जिल्लामा बालबालिकाहरुमाथि जवर्जस्तिकरणिको घटनामा बृद्धि भएको सप्तरी प्रहरीले जनाएको छ ।