जनकपुरका सुनचाँदी व्यवसायी ४० लाख नगदसहित पक्राउ

महोत्तरीको मटिहानी–जनकपुर सडकखण्डबाट स्रोत नखुलेको करिब ४० लाख रुपैयाँसहित एक सुनचाँदी व्यवसायी पक्राउ परेका छन् ।

पक्राउ पर्नेमा धनुषाको मुखियापट्टी मुसरनियाँ गाउँपालिका–१ बस्ने ३८ वर्षीय सुनचाँदी व्यवसायी संजयकुमार साह रहेको जिल्ला प्रहरी कार्यालय महोत्तरीका प्रहरी उपरीक्षक दिनेशकुमार आचार्यले बताए । पक्राउ परेका साह जनकपुरधाममा धनलक्ष्मी ज्वेलर्स नामको सुनचाँदी पसल सञ्चालन गर्दै आएका छन् । मोटरसाइकमा सवार भई मटिहानीबाट जनकपुरधामतर्फ जाँदै गरेको साहलाई मटिहानी नगरपालिका–९ स्थित विग्ही नदीको पुलमाथि प्रहरी चौकी मटिहानीका प्रमुख प्रहरी नायव निरीक्षक सुमन सिंहको नेतृत्वमा खटिएको प्रहरी टोलीले शंका लागेर चेकजाँच गर्दा उनको साथबाट स्रोत नखुलेको ३९ लाख ८० रुपैयाँ बरामद भएको हो ।

पक्राउ परेका साहलाई आवश्यक कारवाहीका लागि मोटरसाइकलसहित जिल्ला प्रहरी कार्यालय महोत्तरीमा पठाइएको प्रहरी उपरीक्षक आचार्यले बताए ।