महोत्तरीमा बेपत्ता सुजिताको शव ट्वाइलेटको हदमा भेटियो, पाँचजना पक्राउ

गएको जेठ २० गते बेपत्ता महोत्तरीको लोहरपट्टी नगरपालिका ७ भ्रमरपुराकी २६ वर्षीया सुजिता ठाकुरको शव शौचालयको हदमा भेटिएको छ ।

व्यापक खोजतलास पश्चात सुजिताको शव आइतबार बिहान आफ्नै पेट्रोल पम्पको छेउमा रहेको शौचालयको हदमा फेला परेको महोत्तरीका प्रहरी उपरीक्षक दिनेश अचार्यले टुडपाटीलाई जानकारी दिए । उनका अनुसार शौचालयमा भेटिएको शव सुजिताकै रहेको माइत पक्षले सनाखत गरेको हो । सुजिताको शवलाई पोस्टमार्टमका लागि प्रादेशिक अस्पताल जनकपुर लगिएको छ । गएको जेठ २० गते बेपत्ता सुजिताको शव अवशेष (कपाल, चुरा, डोरी, नुनको प्याकेट, कपडा) घरभन्दा एक किलोमिटर पर खेतमा गाडेको अवस्थामा असार १३ गते फेला परेको थियो ।

माइत पक्षले छोरी सुजिताको हत्या भएको दावी गर्दै आएको छ । सुजिताकी पाँच वर्षीय छोराले आमाको हत्या भएको पोल खोलेका थिए ।
सुजिताको शवको अवशेष फेलापरेदेखि यता प्रहरीले श्रीमान मुकेश ठाकुर, देवर रुपेश ठाकुर लगायत पाँचजनालाई पक्राउ गरिसकेको छ । शवको अवशेष फेला परेको दिन पति र देवरलाई पक्राउ गरेको थियो । पछि पुनः ३ जनलाई पक्राउ गरिएको प्रहरी स्रोतले जनाएको छ ।

प्रहरीले सुजिता हत्याकाण्डको विषयमा भोलि सोमबार पत्रकार सम्मेलन गरी विस्तृत जानकारी गराउने एसपी आचार्यले जानकारी दिए ।
शवको अवशेष फेला परेपछि एकसाता अघि माइत पक्षले जिल्ला प्रहरी कार्यालय महोत्तरीमा पति, देवर, सासुसुरा देवरानी लगायत ६ जना विरुद्ध किटानी जाहेरी दर्ता गराएको थियो ।

source:todaypati.com