धनुषामा २८ करोडको लगानीमा जैविक मलको उद्योग स्थापना हुदैँ

नेपालमै सबैभन्दा ठुलो लगानीमा धनुषाधाममा जैविक मलको उद्योग सञ्चालन हुने भएको छ ।

आरोह फटिलाईजर प्रा.लि.ले धनुषाको धनुषाधाम नगरपालिकामा २८ करोडको लगानीमा जैविक मलको उद्योग स्थापना गर्न लागेको हो । आउँदो वैशाखसम्म उत्पादन हुने हुने उक्त जैविक मल उद्योगमा शनिबार एक कार्यक्रम बीच प्रदेश २ का भुमि व्यवस्था , कृषि तथा सहकारी मन्त्री शैलेन्द्र प्रसाद साह र संघीय सरकारका कृषि तथा पशुपंक्षी मन्त्रालयका योगेन्द्र कुमार कार्कीले संयुक्त रुपमा शिलान्यास गरेका हुन् । शिलान्यास पश्चात आयोजना गरिएको शुभकाना कार्यक्रममा मन्त्री साहले आरोह फर्टिलाईज प्रालिले स्थापना गर्न लागेको जैविक मल उद्योग प्रदेश २ को मात्र नभई नेपालकै लागि गौरवको कुरा रहेको बताए । वर्षेणी हुने मल अभावले नेपाली किसानले चाहे जति उत्पादन गर्न नसकिरहेको अवस्थामा प्रदेश २ का संचालन हुन लागेको जैविक मल उद्योगले त्यस्ता समस्यालाई धेरै हद सम्म समाधान गर्न सक्ने मन्त्री साहले बताए । नेपाल कृषि प्रधान देश भनिएपनि कृषि क्षेत्रमा संघीय सरकारको लागि एकदम न्युन रहेको भन्दै मन्त्री साहले भने,‘ नेपाललाई कृषि प्रधान देश भनिन्छ । तर वास्तवमा यो कृषि प्रधान देश नै होईन, यो त किसान प्रधान देश हो । यहाँ ६० प्रतिशत भन्दा बढि व्यक्तिको आय कृषिमा आधारित छन् । तरपनि सरकारको यसमा लगानी छैन ।’ प्रदेश सरकारले प्रदेशलाई व्यवहारमा कृषि प्रधान बनाउन लागेको मन्त्री साहले दावी गरे ।

धनुषामा पहिलो पटक नेपालमा यतिको लगानीमा जैविक मल सम्बन्धि उद्योग संचालन हुन लागेकोले नेपाली किसानको लागि खुसीको सन्देश रहेको कृषि तथा पशुपंक्षी मन्त्रालयका सचिव योगेन्द्र कुमार कार्कीले बताए । सुरुवाती अवस्थामै २८ करोडको लागतमा निर्माण हुन लागेको उक्त जैविक मल उद्योगले नेपालका कृषकहरुको लागि सुखद खबर रहेको बताए । त्यसैगरि, भुमि व्यवस्था, कृषि तथा सहकारी मन्त्रालयका सचिव डा. सम्झना काफ्लेले प्रदेश सरकारले जैविक मल उद्योगमा आवश्यकता अनुसार सहयोग गर्न तयार रहेको बताईन् । अमेरिकाको वाईमिक्स कम्पनी र भारतको व्हाईसोड ब्योनेट कम्पनीको प्रविधिक सहयोगमा आरोह फटिलाईजरले निर्माण गर्ने जैविक मलले खेतको उर्वराशक्ति बढाउनुको साथै माटोमा रहेको विषादीलाई समेत हटाउने आरोह फर्टिलाईजर प्रालिका अध्यक्ष शैलेन्द्र शमशेर राणाले बताए । नेपालमा वार्षिक साढे ७ लाख मेट्रिक टन जैविक मलको आवश्यकता छ, उनले भने,‘ तर आफुहरुले तत्काल वार्षिक रुपमा ७ देखि ८ सय मेट्रिक टन उत्पादन गर्ने योजनामा छौ ।

संघीय र प्रदेश सरकारबाट सहयोग भएको खण्डमा उत्पादन बढाउछौ ।’ कार्यक्रममा राप्रपाका केन्द्रिय सदस्य मनोज मल्ल, प्रेक्षा मल्ल, आरोह फर्टिलाईजर प्रा.लि.सञ्चालक समितिका सदस्य आङ्गकामी लामा (शेर्पा)सहितका सहभागिता रहेको थियो ।