६० लाख रुपियाँ हिनामिना गरि जनकपुरधाम-२० का वडाध्यक्ष बेपत्ता

जनकपुरधाम उपमहानगरपालिका वडा नम्बर २० को वडा कार्यालयका जनप्रतिनिधि तथा कर्मचारीहरु चार दिनदेखि बेपत्ता भएपछि स्थानीय सेवाग्राही मर्कामा परेका छन् । उनीहरु कार्यालय आउन छाडेका कारण सेवाग्राही आक्रोशितसमेत बनेका छन् ।

वडा नम्बर २० का वडा अध्यक्ष भोगेन्द्र झा र सचिव अनिलकुमार मिश्र लामो समयदेखि कार्यालय आएका छैनन् । स्थानीय तहका पदाधिकारी यसरी लामो समयदेखि कार्यालय आउन छाडेर सम्पर्कविहीन हुँदा स्थानीय वासिन्दाको कामकारबाही प्रभावित भएको छ । सेवाग्राही वडाका पदाधिकारीविरुद्ध आन्दोलनमा उत्रने तयारीसमेत गरेका छन् ।

घरदैलौमा सेवाग्राहीले सरकारका सेवा सुविधा पाउन भनेर स्थानीय सरकारको परिकल्पना गरिएको हो । तर स्थानीय तहका पदाधिकारीहरु शासनकर्ताको रुपमा आफूलाई स्थापित गर्दै मनपरी गर्न थालेपछि जनविद्रोहको अवस्था सिर्जना भएको छ । जनताको मत लिएर निर्वाचित वडाअध्यक्ष र जनताको सेवा गर्न सपथ खाएर सरकारी सेवामा भर्ना भएका सचिव नै जनताको कामकारबाहीप्रति उदासीन रहेर चरम भ्रष्टाचारमा लिप्न हुन थालेका छन् । वडाको विकासका लागि आएका रकम विकासका नाममा चारो हालेर जनताको आँखा छल्दै झवाम्म पारेका स्थानीय वासिन्दाहरु बताउँछन् । वडाको विकास बजेटमध्ये करिब ६० लाख रुपियाँ बराबरको हिनामिना गरेको र जनताले त्यो विषय उठाउँदा कार्यालय नै आउन छाडेको बताइएको छ ।

वडा अध्यक्ष र वडा सचिव लामो समयदेखि बेपत्ता हुँदा विधवा, अपाङ्ता भएका व्यक्ति, असहाय गरिब, ज्येष्ठ नागरिक लगायतले पाउने सामाजिक सुरक्षा भत्तासमेत पाउन सकेका छैनन् । शिक्षा, स्वास्थ्य, कृषि क्षेत्रको विकासका लागि आएको बजेटसमेत दुरुपयोग गरी आफ्ना नातेदारहरुलाई बाँडेका छन् । वडा अध्यक्ष झा र वडा सचिव मिश्रले गरेको चरम भ्रष्टाचारका विरुद्ध अख्तियार दुरुपयोग अनुसन्धान आयोगमा उजुरी दिने तयारीसमेत गरिएको स्थानीय वासिन्दा प्रेम झाले बताए ।

news source:thenepaltop.com

plz subscribe our youtube channel and support us