सिरहाबाट दुई युवतीको उद्यार, बेच्न लैजाँदै गरेको दुई महिला पक्राउ

सिरहा प्रहरीले दुई युवतीलाई बेचबिखनको लागि भारतीय सीमातर्फ लैजादै गरेको अवस्थामा दुईजना महिलालाई पक्राउ गरेको छ । नरहा नगरपालिका वडा ३ स्थित चोहर्वाबाट बेचबिखनका लागि भारततर्फ लगिरहेको दुई युवतीसहित दुई महिलालाई शुक्रबार बेलुकी प्रहरीले पक्राउ गरेको हो । पक्राउ पर्नेमा सप्तरीको कञ्चनरुप नगरपालिका वडा ११ की २८ वर्षीया ललिता चौधरी र सिरहाको धनगढिमाई नगरपालिका वडा १ की ३५ वर्षीया उषा देवी मलाह छन् । युवतीहरुको परिचय भने प्रहरीले खुलाएको छैन ।

युवतीहरु बेचबिखन तथा ओसारपसार भइरहेको भन्ने गोप्य सूचनाको आधारमा युवतीको उद्धार र संलग्नलाई पक्राउ गरिएको इलाका प्रहरी कार्यालय मिर्चैयाका डीएसपी राजेन्द्र श्रेष्ठले बताए । उनका अनुसार, ती महिलाहरुले युवतीहरुलाई लहान आश्रममा मासिक ५० हजारको काममा लगाइदिने भनी ललाइफकाइ प्रलोभनमा पारेर भारततर्फ लगिरहेका थिए । उनीहरूमाथि मानव बेचविखन तथा ओसारपसार कसुरमा मुद्दा दर्ता गरी थप अनुसन्धान भइरहेको र आइतबार जिल्ला अदालतमा पेश गरिने डीएसपी श्रेष्ठले बताए ।