सर्पको टोकाइबाट बालकको मृत्यु, नगरपालिका विरुद्ध प्रदर्शन

बाराको सिम्रौनगढमा सर्पको टोकाइबाट एक बालकको मृत्यु भएको छ ।

मृत्यु हुनेमा सिम्रौनगढ नगरपालिका वडा नं.२ महुवाई बस्ने समेद प्रसाद गुप्ताका २ बर्षीय छोरा रहेका छन् । राति सवा १२ बजे सर्पले टोकेपछि बालकको उपचारको लागि सिम्रौनगढस्थित सिम्रौनगढ नगर अस्पतालमा लगिएको थियो । तर उपचारको क्रममा उनको मृत्यु भएको हो ।

बालकको मृत्यु भएपछि उनका आफन्तले शव लिएर नगरपालिकाविरुद्ध प्रदर्शन गरेका छन् । उनीहरुले नगरपालिकाका मेयर विजय शंकर यादवविरुद्ध चर्को नाराबाजी गर्दै विरोध प्रदर्शन गरेका छन् । उनीहरुले डाक्टरको लापरबाहीले बालकको मृत्यु भएको आरोप लगाएका छन् ।

सिम्रौनगढ अस्पतालमा बच्चालाई उपचारको लागि ल्याउँदा समयमै उपचार नगरी नाम ठेगााना सोध्ने, प्रहरीलाई खबर गर्ने लगायतका कुरामा अल्झाएर राखेका कारण समयमा उपचार नपाइ आफ्नो छोराको मृत्यु भएको मृतकका बुवा सुमेद गुप्ताले बताए । अस्पतालका डाक्टरहरुले सर्पको डसाइको उपचार यहाँ सम्भव नरहेको बताएका थिए । एम्बुलेन्स पनि उपलब्ध नभएकोले ढिला गरी कलैया अस्पताल लैजाँदा नाबालक छोराको मृत्यु भएको गुप्ताको गुनासो छ ।