जिल्ला प्रहरी कार्यालय महोत्तरीले आर्केष्ट्रा कार्यक्रममा प्रतिबन्ध लगाउंदै अवज्ञा गर्नेमाथि कडा कारवाही गर्ने जनाएको छ ।
केहीदिन यतादेखि आर्केष्ट्रा कार्यक्रमा झैझगडा भई अपराधिक घटनामा समेत बृद्धि भएको भन्दै जिप्रका महोत्तरीले आर्केष्ट्रमाथि प्रतिबन्ध लगाएको हो । जिल्लामा पछिल्ला केही महोत्सवहरुमा आयोजित आर्केष्ट्रा कार्यक्रममा अश्लिल गितहरु बजाउँदा समाजमा नकारात्मक प्रभाव परेको , लागूऔषध दुव्र्यसनीहरुको बिगबिगी समेत बढ्ने गरेकोले यसको नियन्त्रणको लागि प्रतिबन्ध लगाएको जिल्लाका प्रहरी प्रमुख एसपी दिनेश आचार्यले बताए ।
पछिल्लो समयमा जिल्लाका विभिन्न ठाउँमा भएको उत्सवको भीडको लाभ उठाएर गाउँ गाउँमा चोरीका घटनाहरु समेत ह्वात्तै बढेर गएपछि जिल्ला प्रहरी कार्यालय महोत्तरी गंभिर भएको हो । एसपी आचार्यले मातहतको प्रहरी कार्यालयहरुलाई आ आफ्नो क्षेत्रमा आर्केष्ट्रा कार्यक्रम गर्न नदिन निर्देशन दिएका छन् । यदि कसैले कुनै बहानामा आर्केष्ट्रा कार्यक्रमको आयोजना गर्ने , निर्देशन नमान्ने आयोजक र कलाकारहरुलाई समेत नियन्त्रणमा लिन एसपी आचार्यले निर्देशन दिएका हुन ।
आर्केष्ट्रा कार्यक्रममा बजाईने अश्लिल गीत तथा नृत्यले समाजमा विकृति फैलिने र कार्यक्रममा मदिरा तथा लागूऔषध सेवन गर्ने क्रम बढेकोले यसको लागि समेत प्रतिबन्ध अहिलेको आवश्यकता रहेको एसपी आचार्यले बताए ।
फेसबुकबाट तपाईको प्रतिक्रिया !