बैजनाथ मन्दिरको ६ क्विन्टल ६१ किलोको घण्टी चोरी, २ जना पक्राउ

कञ्चनपुरकाे सिद्ध बैजनाथ मन्दिरकाे छ क्विन्टल ६१ किलो पुराना घण्टी  सहित दुइ जना पक्राउ परेका छन् । महेन्द्रनगरका प्रतिष्ठित व्यापारी पदम ठकुराठीको गाेदामबाट  प्रहरीले छ क्विन्टल ६१ किलो पुराना घण्टी  सहित दुइ जना पक्राउ गरेकाे हाे ।

पक्राउपर्नेमा भीमदत्त नगरपालिका–१५ का ५८ वर्षीय पदक कोली र बजारमा डेरी गरी बस्ने बैतडीका ३८ वर्षीय धनीराम टमटा रहेका छन् ।  जिल्ला प्रहरी कार्यालय कञ्चनपुरको टोलीले महेन्द्रनगर बजारस्थित गल्ली नं १ मा रहेको ठकुराठी ब्रदर्शको गोदाममा छापा मार्दा मन्दिरबाट चोरेर बिक्रीका लागि ल्याइएका उक्त परिणामको घण्टी बरामद गरेको जिल्ला प्रहरी कार्यालय कञ्चनपुरका प्रहरी निरीक्षक लालबहादुर बमले बताउनुभयो ।

ठकुराठीको गोदाममा प्रहरीले छापा मार्न लाग्दा गोदाम बैंकले भाडामा लिएको भन्दै खोल्न आनाकानी गरेका थिए । गाेदामबाट घण्टी टल्काउने दुई मजदुरका साथै घण्टी टल्काउने प्रयोग गरिने उपकरण पनि नियन्त्रणमा लिएको प्रहरीले जनाएकाे  छ ।

घटनाका विषयमा अहिले प्रारम्भिक अनुसन्धान चलिरहेको गोदाम साहू र यहाँको सिद्ध बैजनाथ मन्दिर कार्यसमितिका पदाधिकारीलाई पनि अनुसन्धानका लागि बोलाइने प्रहरी निरीक्षक बमले बताउनुभयो । व्यापारी ठकुराठीले भने मन्दिर समितिले लिलाम गरेका पुराना घण्टी लिएको जिकिर गरेका छन् ।