धनुषासंग जुटेका नेपाल प्रवेश गर्ने भारतीय नाका पूर्णरूपमा खुला

धनुषाको विभिन्न नाका हुँदै नेपाल प्रवेश गर्ने भारतीय नाकाहरू पूर्णरूपमा खुला गरिएको छ । 

भारतबाट नेपाल प्रवेशका लागि धनुषाको जटही, महिनाथपुर, इनर्वा, दुहवी र धनौजी भन्सार कार्यालयलाई तोकिएको हो । भन्सार कार्यालय जनकपुरका प्रमुख प्रमोद दासका अनुसार नेपाल प्रवेश गर्ने भारतीय नाका खुला गरिएपछि भन्सारका कर्मचारीलाई पनि नाकामा परिचालन गरिएको छ ।  ‘कर्मचारीहरू आज बिहानैदेखि स्टयाण्डबाई नाकाहरूमा बसेका छन् । गाडीहरू प्रवेश गर्दा भन्सार काटिने छ,’ उनले भने । भारतीय सवारीसाधन नेपाल आउन चाहे विगतमा जस्तै भन्सारलगायतका राजस्व काटिने प्रमुख दासले जानकारी दिए । 

उनले सरकारले भन्सार कार्यालयलाई परिपत्र गरेपछि नाकाहरू खुलेको बताए । यता, भारतीय नागरिक नेपाल प्रवेश गर्दा कोभिड–१९ परीक्षणको नेगेटिभ रिपोर्ट पेस गर्नुपर्ने जिल्ला प्रशासन कार्यालय धनुषाले जनाएको छ ।  कोभिड–१९ संकट व्यवस्थापन केन्द्र धनुषाको बैठकले यस्तो निर्णय गरेको प्रमुख जिल्ला अधिकारी बन्धुप्रसाद बास्तोलाले जानकारी दिए । भारतीय नागरिकले ७२ घण्टाभित्र कोभिड-१९ को नेगेटिभ रिपोर्ट साथमा लिएर आएपछि मात्र नेपाल प्रवेश गर्न अनुमति दिइने प्रमुख जिल्ला अधिकारी बास्तोलाले बताए ।
 
‘नेपाल प्रवेश गर्ने व्यक्तिमा कोभिड–१९ को लक्षण देखिएमा तत्कालै उसको एन्टिजेन परीक्षण गरिने र रिपोर्ट नेगेटिभ आएपछि मात्र प्रवेश गर्न दिइनेछ,’ उनले भने ।  नाकाहरुमा सम्बन्धित स्थानीय तहलाई हेल्थ डेक्स सञ्चालन गर्न समेत अनुरोध गरिएको प्रजिअ बास्तोलाले बताए ।  

सामाचार श्रोत फरकधारडटकम