भ्रष्टाचार गरेको आरोप लगाउँदै धनुषाको सबैला नगरपालिकाका मेयर बिजय शंकर साह र कर्मचारी विरुद्ध नगरबासीले भैंसी जुलुस निकालेका छन् ।
भ्रष्टाचारविरुद्ध संयुक्त संघर्ष समितिको पदाधिकारीले विभिन्न शिर्षकमा सूचना माग गर्दै विगत १४ दिनदेखि अनसन जारी राखेका छन् । उनीहरुको समर्थनमा नगरबासीले आज मेयर साह र कर्मचारीहरु विरुद्ध भैंसी जुलुस निकालेका हुन् ।
सूचना माग गर्दा पनि भैंसी जस्तै मौन मेयर साह, प्रमुख प्रशासकिय अधिकृत बलबिर ठाकुर, लेखा अधिकृत शिव कुमार झा र इन्जिनियर रञ्जित यादव मौन बसेकाले उनीहरु विरुद्ध सांकेतिक रुपमा भैंसी जुलुस निकालेको बताइएको छ । जुलुसमा सहभागीहरुले मेयर र कर्मचारीहरु विरुद्ध नाराबाजी समेत गरे ।
मेयर र कर्मचारीको मिलोतोमा नगरपालिकामा व्यापक भ्रष्टाचार भएकोले सूचना माग गरिएको र सूचना उपलब्ध गराउन आनाकानी गरेकाले अनसन बसेको भ्रष्टाचारविरुद्ध संयुक्त संघर्ष समितिका संयोजक सुरेश यादवले बताए । उनले सूचना नदिएसम्म अनसन जारी राख्ने पनि बताए ।
फेसबुकबाट तपाईको प्रतिक्रिया !