अमेरिकी विदेश मन्त्रालयले डिभी खुल्ने मिति घोषणा गरेको छ । असोज २० बुधबार बेलुका पौने १० बजेदेखि डिभी लटरीका लागि फाराम भर्न सकिने जनाइएको छ ।
डिभी भर्दा एक भन्दा बढी आवेदन दिँदा स्वतः रद्द हुने अमेरिकी विदेश मन्त्रालयले जनाएको छ । डिभी २०२३ का विजेताहरुले सन् २०२३ को सेप्टेम्बर ३० सम्म भिसा प्राप्त गर्नसक्ने छन् । नतिजा सन् २०२२ को मे महिनामा आउनेछ ।
विगतमा डिभी लटरीमा सहभागी भएकाहरुले पनि यसपटक डिभी भर्न सक्ने जनाइएको छ । यसपटक बंगलादेश, ब्राजिल, क्यानाडा, चीन, कोलम्बिया, डोमेनिकन रिपब्लिक, एल साल्भाडोर, हैटी, होण्डुरस, इन्डिया, जमैका, मेक्सिको, नाइजेरिया, पाकिस्तान, फिलिपिन्स, साउथ कोरिया, यूके, भेनेजुएला र भियतनामका नागरिकहरुले भने डिभीका लागि फाराम भर्न पाउने छैनन् ।
विगत ५ वर्षमा ५० हजारभन्दा धेरै आप्रवासीहरु अमेरिकामा बसाइ सराइ गरेका देशका नागरिकहरू डिभी भर्नबाट वञ्चित हुनेछन् । डिभी भर्दा नाम, जन्म मिति, जन्मस्थान, पासपोर्ट विवरण, फोटो, ठेगाना, फोन नम्बर, इमेललगायत विवरणहरु बुझाउनुपर्छ ।
विगतमा प्रयोग भएको वा ६ महिनाभन्दा पुरानो फोटो डिभी भर्दा प्रयोग नगर्न सुझाव दिइएको छ । डिभीका लागि आवेदन भर्दा विवाहितले दम्पत्तिको सबै विवरण र बच्चाबच्ची हुनेहरुले उनीहरुको सम्पूर्ण विवरण उल्लेख गर्नुपर्छ ।
फेसबुकबाट तपाईको प्रतिक्रिया !