जनकपुर जलेश्वर सडकमै बजार, दुर्घटनाको जोखिम उच्च

जनकपुरधाम भिठ्ठामोड सडक खण्डको विभिन्न स्थानमा सडककै बिचोबिच बजार आयोजना गर्ने प्रवृति बढेर गएको छ ।

जनकपुरधाम भिठ्ठामोड सडक खण्डको लादो बेला, चाँदनी चोक , पिपरा चोक , पर्सा चोक लगायतको सडकहरुमा नियमित रुपमा बजारको आयोजना हुँदै आएको छ । सडक पेटीमै तरकारी , फलफुल , माछामासुको बिक्री वितरण हुनेगरेको छ भने सडकका डिभाईडरहरु खाजाको पसलेहरुको लागि चुल्होको भठ्ठिको रुपमा प्रयोग भईरहेको छ । बजारको कारण सवारी आवागमन अवरुद्ध हुने गरेको छ भने अर्को तर्फ सडक दुर्घटनाको सम्भावना बढेको बेथीतिपुर्ण अवस्था हुँदा हुँदै पनि सरोकारवालाहरु मौन बसेका छन ।

‘व्यवस्थित बजारको अभावको कारण हामी सडकमै पसल संचालन गर्न बाध्य छौं, आजदेखि हो र मेयरको लापरवाहीले हामी पाँच वर्षदेखि सडकमै पसल थाप्दै आएका छौं ।’– चाँदनी चोक बजारमा मुरही कचरीका पसल संचालक रामेश्वर साहले भने । पिपरामा व्यवस्थित बजार हुँदा हुँदै पनि सडक पेटीमै बजारको आयोजना गर्दा पनि स्थानीय प्रशासन मौन छ भने स्थानीय निकायहरुको समेत ध्यानाकर्षण हुन सकेको छैन ।

त्यस्तै जनकपुरधाम भिठ्ठामोड सडक खण्डका डिभाइडरमा रोपिएका विरुवाको सुरक्षाको निम्ति लगाईएका जालीहरु सर्वसाधारणहरुको लुगा सुकाउने स्थानमा परिणत हुँदै गएको छ । विजयादशमीको सुरुवात संगै सडकहरुमा सवारीको चाप बढेको छ । यस्तो अवस्थामा सडकमै बजारको आयोजनाले सडक अनुशासन पालना गराउने ट्राफिक प्रहरी निरिह बनेका छन ।