बर्दिवासका २ युवकसहित तीनजना लागुऔषध खैरो हिरोइनसहित पक्राउ

काठमाडौंको टोखाबाट लागुऔषध खैरो हिरोइनसहित तीनजना पक्राउ परेका छन् ।

पक्राउ पर्नेमा सिन्धुली दमौली घर भई टोखा बस्दै आएका ३५ वर्षीय यादव कार्की, महोत्तरी बर्दिबासका २० वर्षीय दलबहादुर विक र ३० वर्षीय नयन विक रहेका छन् । महानगरीय प्रहरी परिसर काठमाडौंले सोमबार दिउँसो साढे १ बजे टोखा नगरपालिका वडा नम्बर ११ ग्रीनल्यान्ड ओमप्लाजास्थित एक घरबाट तीन जनालाई पक्राउ गरेको प्रहरी उपरीक्षक रमेश बस्नेतले जानकारी दिए । 

ग्रीनल्याण्ड ओमप्लाजा बस्ने टेकनाथ न्यौपानेको चार तले घरको तेस्रो तलामा डेरा गरी बस्ने यादव कार्कीको कोठामा खैरो हिरोइनको कारोबार गरिरहेको भन्ने सूचना प्रहरीले पाएको थियो । सोही सूचनाको आधारमा महानगरीय प्रहरी वृत्त महाराजगन्जबाट खटिएको प्रहरीको टोलीले तलासी लिँदा उनीहरूको साथबाट ८४ ग्राम खैरो हिरोइन बरामद भएको बस्नेतले बताए ।

साथै प्रहरीले ४४ हजार ६ सय नेपाली रुपैयाँ र ४ हजार ९ सय भारू बरामद गरेको छ । घटनाबारे उनीहरूमाथि थप अनुसन्धान भइरहेको प्रहरीले जनाएको छ ।

news/photo: todaypati.com