धनुषाका रामभजन महतो उर्फ भुट्टाचोर महोत्तरीबाट पक्राउ

धनुषाको विदेह नगरपालिका ६ गिद्धा बस्ने ३५ वर्षका भुट्टाचोर (रामभजन महतो)लाई महोत्तरीको गोनरपुरा भन्ने स्थानबाट गए राति पक्राउ गरेको तीनकौरिया प्रहरीचोकीले जनाएको छ ।

धनुषामा घाँस काट्न गएकी एक महिलाको चाँदीको गहना लुट्न घाँटी रेटेर मार्ने प्रयास गरेका भुट्टाचोर भन्ने रामभजन महतो महोत्तरीबाट पक्राउ परेका छन् । उनले गहना लुट्न शुक्रबार बिहान ११ बजेको समयमा स्थानीय रामबहादुर मण्डलकी ५५ की श्रीमति जमुन देवी मण्डलको घाँटी रेटेर मार्ने प्रयास गरेका थिए । स्थानीयले देखेपछि भुट्टाचोर भागेका थिए ।

फरार भएर ससुरालीमा बसिरहेका भुट्टाचोरलाई प्रहरी चौकी तिनकोरियाका सई सारदा शंकर साहको कमाण्डमा खटि गएको प्रहरी पक्राउ गर्न सफल भएको हो । घाँटी रेटिएकी जमुनदेवीको घाँटीमा ९ वटा टाँका लगाइएको छ । उनी प्रादेशिक अस्पताल जनकपुरमा उपचार पश्चात घर फर्किएकी छन् ।

स्थानीयका अनुसार भुट्टाचोर वैदेशिक रोजगारीको क्रममा मलेसियामा रहँदा पनि चोरीचपाटी गर्दै आएका थिए । उनी गाउँमा भुट्टाचोर नामले प्रख्यात छ । गाउँमा पनि चोरी गर्ने गरेको स्थानीय बताउँछन् । सोहि क्रममा जमुन देवी घास काट्न गएको बेला उनले खुट्टामा लगाएको चाँदीको काँरा, गालाको मँगलसुत्र खोस्न छुराले घाँटी रेट्ने प्रयास गरेका थिए । हल्ला भएपछि उनी जमुनदेवीको मंगलसुत्र खोसेर भागेका थिए ।

news/photo : todaypati.com