अचेल जनकपुरधाममा पर्वको नाममा भिख माग्ने अनौठो दृश्य देखिएको छ ।
चाडपर्वको नाममा उनीहरु आस्थाप्रति नै नकारात्मक भाव उत्पन्न हुनेगरी भिख माग्ने गरेका छन् । मंगलबार बिहान साढे आठ बजेतिर जनकपुरधाम उपमहानगरपालिका–२० बिन्धी र लादोको मध्यमा करिब दुई दर्जन बालबालिकाहरु कनसुप्ती लिएर जनकपुर बजारतर्पm आउनको लागि हतार हतारमा अटोचढ्दै थिए । बालबालिकासँगै उनीहरुका अभिभावक पनि अटो चढेर जनकपुर आई भिख माग्ने गरेका छन् । भिख माग्नको लागि बालबालिकाहरु जनकपुरधामतर्फ गइरहेको अटो चालक सोनफी साफीले बताए ।
भिखारीहरुले अटो रिजर्व नै गरेर जनकपुर आउने गरेका साफीले बताए । बिहानै चार पटक ओहोरदोहोर गरी करिब सय जना भिखारीलाई जनकपुरधाम पु¥याउने गरेको उनले थपे । दशैंदेखि छठ पर्वसम्म करिब एक महिना नियमित रुपमा अटो रिजर्व गर्ने गरेका छन, दिनको पाँच सयदेखि एक हजार रुपैया त उनीहरुले अटोमै खर्चिने गरेको चालक साफीले जानकारी दिए । भिख माग्ने बालबालिकालाई चाडपर्व बारे न कुनै जानकारी छ, न कुनै सरोकार । छठ पूजामा प्रयोग गरिने कनसुप्ती लिएर बालबालिकाहरु दैलो–दैलोमा पुग्ने गरेका छन् ।
अभिभावकले छठ पूजा गर्ने भन्दै उनीहरुले घरधनीसित भिख माग्ने गरेको देखिएका छन् । भिख माग्नकै लागि जनकपुरधामको बसबिट्टी, बसपार्क र बिन्धीस्थित खाली चौरमा करिब दुई सय परिवार पाल टाँगेर बसेका छन् । उनीहरु करिब दुई महिना अगाडिदेखि नै त्यहाँ बस्दै आएको र छठ सकिए पछि अन्य स्थानमा बास सर्ने भारत बिहार राज्य देउधा गाउँकी मालतीले जानकारी दिइन् । उनी भन्छिन, ‘हाम्रो घरबार छैन्, हामी देउधाका हौं । यहाँ छठ पर्वसम्म बस्ने हो, पछि अन्य ठाउँ सर्नेछौं ।’
यी बालबालिकाहरु बिहानदेखि बेलुकासम्म जनकपुरधाममा छठ पर्व गर्ने नाउँमा भिख माग्ने गरेका छन् । छठ प्रतिको आस्थाको कारण केही न केही भिख दिने गरेको स्थानीयहरु बताउँछन् । घरबार नै नभएकाहरुले छठिमाताको नाममा मात्रै भिख माग्ने गरेका छन् । यिनीहरुको भिख माग्ने शैलीप्रति कतिपय व्यक्तिहरु दिक्क मान्ने गरेका छन् । छठ पर्वको नाउँमा चुप लागेर दिने गरेको जनकपुरधामका चिया पसले रामु साहले बताए । एक दिनमै १०/१० जना माग्न आउँदा तनावै हुने गरेको दुखेसो साहले पोखे । छठ पर्व गर्नुछ भन्दै भिख माग्छन्, अब छठपर्वको नाउँमा भिख माग्नेलाई कसरी नदिउँ ।
दिउँ त कति जनालाई दिउँ भन्ने समस्या हुने गरेको उनको भनाइ छ ।
फेसबुकबाट तपाईको प्रतिक्रिया !