जनकपुर : रुपेठामा निषेधाज्ञाको समय बढाइयो

जनकपुरधाम उपमहानगरपालिका २० रुपैठामा दुई समुदायबीच भएको झडपका कारण उत्पन्न तनाव साम्य नभएपछि निषेधाज्ञाको समय बढाइएको छ ।

धनुषाका प्रमुख जिल्ला अधिकारी बन्धु प्रसाद बास्तोलाले कार्तिक ३० गते मंगलवार राति १० बजेसम्म निषेधाज्ञा जारी रहने सूचना निकालेका छन् । छठ पर्वका लागि घाट बनाउने विषयमा हिन्दु–मुस्लिम समुदायबीच भएको विवाद उग्ररुप लिएपछि स्थानीय प्रशासनले शनिबारदेखि आइतबार राति १० बजेसम्मका लागि निषेधाज्ञा जारी गरेको थियो ।

तर अवस्था साम्य नभएपछि निषेधाज्ञाको समय थपिएको छ । भेला जुलुस, प्रदर्शन, घेराउ, र्‍याली, सभाजस्ता क्रियाकलाप गर्न रोक लगाएको प्रमुख जिल्ला अधिकारी बास्तोलाद्वारा जारी सूचनामा उल्लेख छ । आदेशको उल्लंघन गर्नेलाई कानून बमोजिम कारवाही गर्न सकिने चेतावनी समेत दिइएको छ ।

पूर्वमा जलाद नदीको कर्ली बाँध, पश्चिममा जनकपुर–जटही मार्ग दोबाटो, उत्तरमा हनुमाननगर रामपुर बहुअर्वा जाने बाटो र दक्षिणमा देवपुरा निमचौकदेखि बहुअर्वा जाने बाटोसम्मलाई निषेधाज्ञाको क्षेत्र तोकिएको छ ।

news : todaykhoj.com please follow us for more news and information.