जानकी हेल्थकेयरमा शुरु भयो पाठेघरको अपरेशन गर्ने ल्याप्रोस्कोपी प्रविधि

जनकपुरधाममै पहिलो पटक जानकी हेल्थ केयर एण्ड टिचिङ्ग हस्पीटलले बिना चिरफारको पाठेघर अपरेशन गर्ने ल्याप्रोस्कोपी प्रविधि संचालनमा ल्याएको छ ।

प्रदेश २ मा एकमात्र नेशनल मेडिकल कलेजले संचालन गर्दै आएको ल्याप्रोस्कोपी (दूरबीन) अपरेशन गर्ने प्रविधि अब जानकी हेल्थकेयरले सोमवारदेखि संचालनमा ल्याएका छन । पहिलो दिनमै एक महिलाको पाठेघरको शल्यक्रिया गरी सफल उपचार गर्न सफल भएको सो अस्पतालले दाबी गरेको छ । ‘चिकित्सा क्षेत्रमा नेपालका लागि यो नयाँ प्रविधि हो,’ अस्पतालका स्त्री तथा प्रसूति रोग विशेषज्ञ एवं सर्जन डा. विरेन्द्र भगतले भने, यो प्रविधिले ल्याप्रोटोमी प्रविधिभन्दा कम झन्झिटिलो, कम खर्चिलो सुरक्षित रहेको छ ।

ल्याप्रोटोमी प्रविधिले चिरफार गरेर अपरेशन गर्दा ७/८ दिनसम्म अस्पताल र महिनौ दिनसम्म घरमा बस्ने, महिनौसम्म औषधि खाने र पेट चिरेर शरीरमा क्षति पुरयाउने जस्ता समस्या हुन्छ । तर यो ल्याप्रोस्कोपी प्रविधिले ती समस्याहरु बिरामीलाई झेल्नु पर्दैन । यसप्रविधिमा पेटमा मात्र ३/४ ठाउँमा प्वाल पारेर दूरबीनयुक्त क्यामेरा र मोनिटर सहितको मेसिनले गरेको कारण बिरामी दुई भित्र डिस्चार्ज हुनेछ बढी औषधि पनि खानु पर्दैन ।

बिरामीको नाइटो नजिकै र तल्लो पेटको दायाँबायाँ प्वाल बनाइन्छ । नाइटो नजिकै पारिएको प्वालबाट दूरबिन, बत्ती र पेट फुलाउने ग्याँस (कार्बनडाइअक्साइड) भित्र पठाइन्छ । अन्य दुई प्वालबाट स–साना कैंची, चिम्टालगायत सामान पेटभित्र छिराई भीडीओ मोनिटरमा हेरेर योनीबाट पाठेघर निकालिन्छ ।

पछिल्लो केही समयदेखि नेपालमा प्रभावकारी बन्दै गएको ल्याप्रोस्कोपी प्रविधि शल्यक्रिया विश्वस्तरमै पाठेघर लगायतका पेट तथा योनी भित्रका क्यान्सर, मासु बढेको लगायतका रोगका लागि कम खर्चिलो, सहज र विश्वसनीय मानिएको दाबी समेत डा. भगतले गरे ।

news reference:lokpukar.com