मिथिला माध्यमिकी परिक्रमा जनकपुरधाम आइपुग्यो, भोली अन्तरगृह परिक्रमा

मिथिला माध्यमिकी परिक्रमा शनिबार भारतको विशौल विश्राम गरी सोमबार विहान जनकपुरधाम आइपुगेको छ ।

सोमबार बिहानै (आज) परिक्रमाका श्रद्धालुहरु १५ औं विश्रामस्थल जनकपुरधाम आइपुगेका छन् । मंगलबार (भोलि) जनकपुरधाममा अन्तर गृह परिक्रमा गरेपछि परिक्रमा यात्रा पुरा हुने छन् । परिक्रमा यात्रीहरु प्रदेशसभा नजिकको हनुमानगढी, तिरहुतिया गाछी, बाह्रविघा र मठमन्दिरहरुमा बास बसेका छन् । सोमबार विहान अन्तरगृह गरेपछि परिक्रमा यात्रा पूरा हुनेछन् । त्यसपछि यात्री तथा श्रद्धालुहरु घर फर्किने छन् ।

यही फागुन ८ गते जनकपुरधामको हनुमानगढीस्थित जम्मा भएर परिक्रमा यात्रा सुरु भएको थियो । परिक्रमालाई स्वागत तथा व्यवस्थापन गर्न जनकपुरधाम उपमहानगरपालिका, जिल्ला प्रशासन कार्यालय लगायतको निकायले तयारी गरिरहेको छ । हनुमानगढीबाट सुरु भइ परिक्रमा भारतको कल्याणेश्वर, गिरिजास्थान, मटिहानी, जलेश्वर, मडइ, ध्रुवकुण्ड, कञ्चनवन, पर्वता, धनुषाधाम, सत्तोषर, औरही, करुणा, विशौल हुँदै जनकपुरधाम आइपुगेका छन् ।

माध्यमिकी परिक्रमा भाग लिन नसकेको श्रद्धालुहरु अन्तर गृह परिक्रमामा सहभागी भए मोक्षको भागी बन्ने जनविश्वास रहेको छ । नेपाल भारत दुबै मुलुकको धार्मिक सांस्कृतिक एवम् पारम्परिक सद्भावका प्रतीक बनेको परिक्रमा यात्राको नेपालमा १३ तथा भारतमा दुई गरी १५ विश्रामस्थल छन् ।

यस यात्राका सहयात्रीले नेपालका १ सय २ एवम् भारतको २६ गरी १ सय २८ किलोमिटर पैदलयात्रा गर्नुपर्ने हुन्छ । एक सय २८ किल्लो मिटरमा १५ वटा विश्रामस्थल छन् । यी सबै ठाउँहरुमा विशेष देवताका थानहरु छन् । सो विश्रामस्थलमा परिक्रमा यात्रीहरुलाई स्थानीयवासीहरु अत्यन्त उत्साह, श्रद्धा अनि आतिथ्यका साथ राख्दछन् ।

पछिल्लो समय स्थानीय सरकारले पनि व्यवस्थापनमा ध्यान दिने गरेका छन् । ठाउँ ठाउँमा स्वास्थ्य शिविर, भण्डारालगायत सामानको व्यवस्था पनि गर्दछन् । परिक्रमाको अन्तिम दिन जनकपुरधाममा लगभग ८ किमी नगर वरिपरि परिक्रमा गरिन्छ । त्यसपछि परिक्रमाका यात्रीहरु घर फर्किन्छन् र फर्केको भोलिपल्ट होली मनाउने गर्छन ।

please follow us for more news and information.